Afya Ya Kiungu

“Kwa maana mimi ni Bwana nikuponyaye.” Kutoka 15:26

TAFAKARI:

Mungu ameahidi uponyaji na afya kamili kwa watoto wake. Katika Kutoka 15:26, anajifunua kama Yehova Rapha yaani, “Bwana Mponyaji wako.” Neno la Kiebrania (Rapha) linamaanisha kuponya, kurejesha, au kufanya kuwa kamili, na linatumiwa mara nyingi kuonyesha uwezo wa Mungu kuponya kimwili, kiroho, na kihisia.

Katika Agano Jipya, neno la Kigiriki (iaomai) linamaanisha kuponya na linatumiwa kuelezea uponyaji wa miujiza unaotokea papo hapo, unaoletwa na Yesu Kristo. Mfano wake ni katika Mathayo 8:17, ambapo Yesu alitimiza unabii wa Isaya kwa “kuchukua udhaifu wetu na kubeba magonjwa yetu.”

Kupokea uponyaji wa kiungu kunahitaji imani thabiti na kukiri kwa kinywa chako kile ambacho Neno la Mungu linasema kuhusu afya yako. Warumi 10:17 inatufundisha kuwa “imani huja kwa kusikia, na kusikia huja kwa neno la Kristo.” Kwa hiyo, tunapokiri kwa imani ahadi za Mungu kuhusu uponyaji, tunajenga imani yetu na kufungua milango ya kupokea uponyaji huo.

Kukiri kwa imani siyo kusema tu maneno, bali ni kutangaza kwa uthabiti na kuamini moyoni kwamba kile unachokiri ni kweli. Kwa mfano, unaweza kusema:

“Kwa kupigwa kwake, nimepona.”  Isaya 53:5

“Neno la Mungu ni afya kwa mwili wangu wote.” Mithali 4:22

Kwa kufanya hivyo kila siku, unajenga imani yako na kuleta uponyaji wa Mungu katika maisha yako.

TONO YA DHAHABU:

Kukiri kwa imani ahadi za Mungu kuhusu uponyaji ni njia ya kuleta uponyaji wa kiungu katika maisha yako. Endelea kukiri kwa imani kila siku, na utaona mkono wa Mungu ukifanya kazi.

OMBA NAMI:

Baba wa mbinguni, nakushukuru kwa ahadi zako za uponyaji na afya kamili. Nisaidie kuendelea kukiri kwa imani Neno lako kila siku, nikijua kwamba wewe ni Yehova Rapha, Mponyaji wangu. Nijaze na imani, na unirejeshe katika afya kamilifu kimwili, kiakili, na kiroho. Katika jina la Yesu, Amina.

BLESSED!